Ein heilstøypt afterski-plan for annleis-vinteren

Sommaren var eventyrleg for mange som driv innan reiselivet. No er det haustferie, og mykje trafikk. Nordmenn har dei siste månadene fått augo opp for å valfarte i eiget land, og lovorda om «norgesferie» har vore mange. Når haustferien er over, kjem den første store testen for reiselivsnæringa. Då ventar over to månader med «normal» drift, før jula skal ringast inn.

I tida framover vil det neppe bli mykje trafikk i midtveka på hotell og overnattingsstader. Måndag til onsdag har vore dagar som har blitt redda av kurs og konferanse, og utanlandske gjestar. Det er lite som tydar på at det vil bli noko stor trafikk innover landegrensene til Norge i vinter. Og i takt med at talet på teams-møte går opp, går talet på fysiske konferansar ned. Slik smitteutviklinga er i Norge akkurat no, særleg i Oslo og Bergen, vil mykje fortsette å gå føre seg digitalt.

For mange som driv innan reiselivet vil det bli ei utfordring å fylle heile veka. Det skapar hovudbry. Dei tilsette skal framleis fylle timane sine, og ha ein høveleg arbeidskvardag. Det ventar ein vinter som vil kalle på kreativitet og gode løysingar, og at reiselivsaktørane legg hovudet sitt i bløt.

Det gjorde duoen Calle Johansen og Jens Martin Jørgensen i sommar. Kongane av afterski skjønte at sjansen var liten for dansing på borda i Hemsedal til vinteren, og utvikla derfor eit konsept for drift i tråd med smittevernrestriksjonane. Resultatet er ein imponerande plan for Stavkroa, dei kallar det Stavkroa 2.0.

I mai starta dei med å bygge ut. Det var første del av planen. Skaffe fleire kvadratmeter å romme gjestar på. I ein normalsituasjon får 2600 menneske plass i bygget. Det vil skje i framtida, men ikkje i år. Det auka arealet er likevel ein stor fordel når det gjeld å fordele 200 gjestar, som er talet dei får lov å invitere inn. Desse skal få kome i to puljer, to ulike «bordsettinger» om du vil. Dei vil få tildelt eit bord, og der må dei halde seg.

Ingen afterski utan drikkevarer, og for å handtere dette har Johansen og Jørgensen sørga for at gjestene både kan betale og bestille via ein app. Dei må også bruke ein QR-kode når dei går ut og inn av lokalet, slik at det heile tida blir lett å halde oversikten for smittesporing om det skulle kome eit smittetilfelle.

Konseptet er heilstøypt. Og det er ein vinn vinn-situasjon. Det sørgjer for at Stavkroa kan ha drift i vinter. Det sørgjer for at tilreisande til Hemsedal kan oppleve afterski trass i alle restriksjonar. Og: Det sørgjer forhåpentleg for at noko av festinga blir flytta frå private hytter og over i meir ordna forhold.

Måten afterskikongane i Hemsedal har rigga seg for vinteren på, er imponerande. Slike kreative løysingar vil vinteren 2020/21 krevje av mange aktørar, om dei skal kunne drive lønsamt mens me ventar på betre tider. Og ei vaksine.